RAHA YA MAJI MWANZA IMEWAFIKIA WENGI

MKOA wa Mwanza umefanya kazi kubwa ya kukamilisha ujenzi wa miradi mikubwa ya maji vijijini katika kipindi cha miaka mitano iliyopita. Karibu maeneo yote ya miji mikuu ya wilaya, wananchi wake wanapata huduma ya maji safi na salama.

Mhandisi wa Maji wa Mkoa wa Mwanza, Warioba Sanya, anasema, hadi Septemba mwaka jana, maeneo ya pembezoni mwa jiji wanaopata maji ni asilimia 51 na maeneo ya mijini kati ni asilimia 77.

Katika mahojiano , Sanya ambaye kitengo chake kinawakilisha wizara na mkoa katika utoaji wa huduma za maji mijini na vijijini, anaeleza namna utekelezaji wa miradi ya maji unavyofanyika.

Mhandisi huyu wa maji ambaye anasema anawajibika kumshauri Katibu Tawala wa Mkoa katika suala zima la utekelezaji wa ya maji, anasema mkoa wa Mwanza una jumla ya vyanzo vya maji 3,372 vya maji. Kati ya hivyo, vyanzo 2,399 ndivyo vinavyofanya kazi na 933 sawa na asilimia 28, havifanyi kazi kutokana na changamoto mbalimbali ikiwemo kukauka.

“Juhudi zinazofanywa na mkoa kwa sasa ni kuhamasisha jamii kuhakikisha kuwa zinalinda vyanzo vya maji kwenye maeneo yao ikiwa ni pamoja na kulinda na kuhifadhi mazingira,” anasema.

Mtaalamu huyu ambaye miongoni mwa majukumu yake ni pamoja kutayarisha bajeti ya miradi ya maji ya mkoa, anasema katika kipindi cha miaka mitano iliyopita, serikali imetumia sh bilioni 3.7 kwa ajili ya kukarabati jumla ya miradi ya maji 160 iliyokuwa katika hali mbaya kwa wilaya saba za Mwanza.

Miradi hiyo imewanufaisha watu 96,103.

Vituo vya maji 227 katika wilaya za Sengerema, Buchosa, Magu, Mwanza Jiji ( Nyamagana), Misungwi, Kwimba na Ukerewe vinatoa maji safi na salama. Mhandisi huyu ambaye ndiye mwenye jukumu la kusimamia ujenzi wa miradi ya maji inayotekelezwa na wakandarasi, anasema miradi iliyotekelezwa katika kipindi hicho ni miradi ya maji ya bomba 21, visima virefu 19 na matangi ya kuvuna maji 23.

Mingine ni , visima vifupi 19, vyoo vitano na chemichemi moja ambayo ilitekelezwa kwa karibu wilaya zote. Miradi hiyo imegharimu takribani sh milioni 155.7 na kunufaisha jumla ya watu 6,000.

Anaelezea hali ya ukamilishaji wa ujenzi wa miradi ya maji mijini akisema, serikali imekamilisha ujenzi wa miradi mikubwa yenye thamani ya sh bilioni 205 itakayowanufaisha jumla ya wakazi 734,149 kwa miji mitatu ya Ngudu, Nansio na Ukerewe.

Miradi mingine mitatu ya maji ni katika miji ya Misungwi, Magu na jiji la Mwanza ambayo ipo katika hatua za awali za utekelezaji kwa ufadhili wa Benki ya Uwekezaji ya Ulaya (EIB). Miradi hii inatoa fursa kwa miji yote kupata maji ifikapo Juni, 2020 .

Aidha miradi ya maji katika mji ya Misungwi, Magu na jiji la Mwanza iko katika hatua ya awali ya utekelezaji. Kwa upande wa jiji la Mwanza kazi inayofanyika kwa sasa ni kujenga chanzo kingine cha kuhifadhi maji kutokana na chanzo cha Capripoint kushindwa kutoa huduma ya maji kutokana na ongezeko la idadi ya watu waliopo kwa sasa.

Kuhusu maeneo ya milimani jijini Mwanza yaliyo na uhaba wa maji , mhandisi huyu anasema serikali kupitia Mamlaka ya Majisafi na Majitaka jijini Mwanza(MWAUWASA) imefanikiwa kupanua miundombinu ya maji katika maeneo hayo.

Anasema pampu ndogo tayari zimefungwa kwa ajili ya kusukuma maji kwenda maeneo ya Nyasaka-Msumbiji, Lumala, Buswelu, Isamilo, Bugarika, Nyegezi, Buhongwa, Kitangiri na Capripointi.

“Dhamira ya serikali ni kuhakikisha kuwa wananchi wanapata huduma ya maji muda wote,” anasema.

Ipo pia miradi ya maji ya vijiji 10 ambayo mhandisi anaelezea kuwa, utekelezaji wake uko kwenye hatua nzuri ya mafanikio.

Akizungumzia changamoto, mtaalamu huyu anataja kuathirika kwa visima vifupi vinavyosababishwa na upanuzi wa miji unaofanywa na mamlaka ya mipango miji.

Chagamoto nyingine ilikuwa ni ya ujenzi wa makazi na matumizi ya miundombinu ya majitaka ambayo huchafua maji chini ya ardhi.

Lakini pia kuchelewa kwa fedha za maendeleo za usimamizi wa miradi , ni changamoto inayotajwa kuwa kubwa katika utekelezaji wa miradi ya maji mijini.

Changamoto nyingine ni kutoanza kujengwa kwa miradi ya maji inayotoka bomba kuu la Mamlaka ya Kusambaza Maji katika miji ya Kahama na Shinyanga (KASHWASA) kwenda vijiji vilivyopo ndani ya kilometa 12 vilivyokuwa vimepangwa kujengewa miradi kupitia programu ya maji vijijini hususani vijiji vya wilaya ya Misungwi.

Hata hivyo anasema mikakati iliyopo ya kukabiliana na changamoto hizo kwa sasa ni kuelimisha jamii namna bora ya kulinda vyanzo vya maji na kuchimba visima virefu visivyoathiriwa na shughuli za mipango miji, kusimamia na kufuatilia kwa karibu utekelezaji wa miradi ya maji ambayo haijakamilika.