DEBE LA MAHINDI LAFIKA 20,000 WILAYANI BUNDA MKOANI MARA

WAKAZI wa Wilaya ya Bunda mkoani Mara, wanakabiliwa na upungufu mkubwa wa chakula, ambapo sasa bei ya mahindi imepanda. Bei hiyo imetoka sh 14,500 kwa debe moja la mahindi hadi sh 20,000, mtama sh 10,000 hadi sh 17,500, udaga umetoka sh 12,500 hadi sh 17,500 huku ulezi ukifikia sh 30,000 kwa debe.

Gazeti hili limebaini hayo katika uchunguzi wake maeneo mbalimbali pamoja na kwenye masoko wilayani hapa. Bei hiyo imependa kuanzia Agosti na Septemba mwaka jana na haijashuka hadi sasa.

Baadhi ya wafanyabiashara wa nafaka kwenye soko kuu la mjini Bunda, katika jimbo la Bunda mjini na kwenye soko la mji mdogo wa Kibara, katika jimbo la Mwibara, walisema kwa nyakati tofauti kuwa, bei ya chakula imepanda kutokana na kuwepo upungufu mkubwa wa chakula katika maeneo hayo.

Walisema kuwa hali hiyo imetokana na mvua kutokunesha wilayani hapa kwa kipindi kirefu na kusababisha mazao yaliyokuwa yamelimwa mashambani kukauka na pia wakulima wengine kushindwa kulima kwa sababu yakuwepo ukame huo.

Walisema kuwa wamekuwa wakiuza chakula hicho wanachokipata kutoka katika mikoa jirani kwa bei kubwa na kwamba wao pia ulazimika kukiuza kwa bei hiyo ili waweze kurudisha mtaji wao pamoja na faida kidogo tu.

Mfanyabiashara katika soko kuu la Bunda, Esta Samson, alisema kuwa kwa ujumla hali ya chakula katika wilaya inahitaji tahadhari na kwamba hata biashara yao haiendi kama iwalivyokuwa wanatarajia.

“Hali ya chakula katika hili soko letu ni mbaya maana kimepanda sana kutokana na sisi tunavyouziwa kwa bei ya juu sana. Na hii hali tuseme imeaanza mwezi wa nane na wa tisa mwaka jana. Sasa hivi gunia moja la mahindi tunalinunua kati ya sh 110,000 hadi sh 120,000,” alisema Samson.

Baadhi ya wananchi walisema kuwa wanakabiliwa na njaa kubwa na kwamba hali hiyo inatokana na ukame na pia baadhi ya mazao yao yaliyokuwa shambani yalishambuliwa na wanyama, wakiwemo tembo kutoka katika Hifadhi ya Taifa ya Serengeti.