Mbaroni mauaji ya DC mstaafu

POLISI mkoani Pwani inamshikilia Khalid Mohamed (29) fundi ujenzi wa Kibaha Kwamathias wilayani Kibaha kwa tuhuma za kuhusika na matukio mbalimbali ya kihalifu ikiwa ni pamoja na mauaji ya aliyekuwa Mkuu wa Wilaya ya Liwale mkoani Lindi Ephrahim Mmbaga.

Mtuhuhumiwa huyo aliyekutwa na bunduki aina ya SMG na risasi 14 ni mmoja wa watuhumiwa 15 waliokiri kuhusika na matukio mbalimbali ikiwemo tukio hilo la mauaji.

Kwa mujibu wa taarifa iliyotolewa mjini Kibaha kwa vyombo vya habari na Kamanda wa Polisi Mkoa wa Pwani Bonaventura Mushongi, mtuhumiwa huyo alikamatwa Machi 2, mwaka saa 11 jioni eneo la Misugusugu Kata ya Misugusugu Tarafa na Wilaya ya Kibaha.

Mushongi alisema kuwa mtuhumiwa alikamatwa akiwa na silaha hiyo aina ya SMG ambayo namba zake zilikuwa zimefutwa pamoja na risasi hizo.

“Mbali ya kukutwa na silaha hiyo pia alikutwa na risasi za shotgun, mlipuko mmoja, sime moja, mask (kinyago cha kufunika uso) moja na koti moja vyote vikiwa vimewekwa kwenye mfuko wa rambo ukiwa umefukiwa chini ya ardhi kwenye shamba la mtu aliyetajwa kwa jina moja la Swai,” alisema Mushongi.

Akielezea juu ya tukio la mauaji ya aliyekuwa Mkuu wa Wilaya, Kamanda huyo alisema mtuhumiwa huyo na wenzake 15 ambao wanashikiliwa walikuwa wakijihusisha na matukio mbalimbali mkoani humo likiwemo la kumuua Mkuu huyo wa Wilaya.

Mkuu huyo wa wilaya ya zamani aliuawa Februari 18, mwaka huu saa 3:30 usiku eneo la Viziwaziwa tarafa na Wilaya ya Kibaha baada ya kujeruhiwa na kitu chenye ncha kali ambacho inadhaniwa kuwa ni silaha kwenye paja la mguu wa kushoto.