DIALLO, MECK SADIKI NGOMA NGUMU CCM MWANZA

Kuteuliwa kwa DK. Anthony Diallo na Said Meck Sadiki kugombea uenyekiti wa chama cha Mapinduzi (CCM) mkoa wa Mwanza kumezua mjadala miongoni mwa wanachama kuhusu anayefaa kutwaa wadhifa huo sasa.


Vigogo hao walipitishwa na kikao cha Halmashauri Kuu ya Taifa (NEC) ya CCM iliyokutana Dar es salaam hivi karibuni.

Watachuana pia na makada wenzao, Richard Rukambura na Mwenyekiti wa Bodi ya Chama Kikuu cha ushirika cha Nyanza –NCU (1984) Ltd, Enock Masele katika uchaguzi Decemba.

Mbali ya kuwa mfanyabiashara maarufu na mwenyekiti wa CCM Mkoa wa Mwanza miaka mitano ilipita,DK Diallo aliwahi kuwa Naibu Waziri wa Biashara na Waziri wa Maliasili na Utalii Serikali ya Awamu ya Tatu na Nne.

Sadiki aliwahi kuwa Mkuu wa mikoa ya Dar es salaam na Kilimanjaro kwa nyakati tofauti na amepata kuwa katibu wa CCM Mkoa wa Mara.
Wachambuzi wa siasa Mwanza wanatabiri mchuano mkali kati ya DK Diallo na Sadiki kutokana na wote kuwa na sifa za uongozi chama na serikalini zinazoelekea kufanana.

Katibu mwenezi wa CCM tawi la Mabatini, Paschal Costantine, anasema DK Diallo na Sadiki si watu wa kubeza katika mchuano huo.

Kada mwingine, Emmanuel Nzungu,  anasema ugeni wa Sadiki katika kisiasa  mkoani hapa unaweza kumpa faida DK Diallo lakini akaonya historia ya Sadiki serikalini inaweza kumbeba.